立春@高清電視

２００９年２月４日星期三

呢部TOSHIBA舊電視係２０００年７月買，２００７年已經壞過一次，跟住搵人維修啦，點知街邊ｄ人無個肯整，佢地無配件喎！叫我地搵原廠先有得救，為有搵番TOSHIBA啦，因為無做保養，幫我地換咗ｄ無知乜野就OK番喇，人工加配件要成＄８００

舊年１１月開始又發作喇，睇睇吓就出現以上情況，過５－１０分鐘又會無事，幾乎每日都會出現，睇佢心情啦，媽子話通常都係下午睇"真情"果段時間，我就同佢講，可能係大廈換咗高清天線，所以接收得唔係幾好啫！

踏入２００９年佢就變本加厲，我朝早開嚟睇新聞及天氣，睇睇吓就發作，媽子歎完早茶返嚟又發作，"真情"時段又發作，到咗夜晚睇"畢打自己人"又會發作，真係比佢激鬼死！

我又唔想換高清電視住，因為覺得高清接收仲係未穩定，部舊電視ｄ色彩其實仲係好靚，加上我又唔係成日要睇電視果個！

初五果日病鬼咗，瞓咗成日，第二朝起身，媽子同我講噚日無電視睇，話部電視無得救，叫我換咗部電視，佢負責比錢，我話要成萬蚊喎！都睇唔到囉，換啦！

搵埋大細妹去揀電視，目標37－42吋！

去到豐澤，介紹咗部Philips37吋$6900，加個機頂盒$1980

再去中原，睇咗部Panasonic TX-37LZD81H內置高清數碼廣播接收器，日本制造，原價$12800，優惠價$10900

另外介紹一部SONY KLV-40S400A包埋外置高清數碼廣播接收器，馬來西亞制造，原價$12800，有中銀VISA特價$9300，我地無中銀VISA，但個Sales話比現金都做到咁價錢

同細妹商糧，如果P壞咗就成部無用，S壞咗都有番部外置高清數碼廣播接收器，雖然唔係日本制造，但S的信譽都唔錯，最後成交SONY KLV-40S400A，加送兩張$50惠康現金劵！

 

 

返到公司，金水先至話我知華仁會仲平多$400！有格價網都唔早通知呀！

後記：我真係無估錯，接收唔穩定，睇睇吓高清經常性出現hang機！

特別新聞報導@紅運當頭

２００９年２月２日星期一

時間：晚上１１時零三分

地點：大床上

A-ba-ni-bi o-bo-e-bev
a-bo-ni-bev-ma-bo-sa-ba
愛你的只有一個人
愛你的只有一個只有一個我
A-ba-ni-bi o-bo-e-bev
愛你的只有一個我．．．我．．．我．．．我．．．．．．．．．．

播完這首歌，柏緯興奮地跳上床，叫媽咪開奶奶，準備瞓覺．．．

媽咪在廚房聽到柏緯大叫，喊了兩聲，趕快跑回房間，

柏緯小手放在額頭上，血在手指隙滲出，

嚇得媽咪大叫：老公快ｄ睇吓你個仔，仲掛住瞓！

做救護員的爸爸見傷勢嚴重，立即飛的往急症室了！

結果縫了３針！

 

兩日後的他，當沒事發生過的！媽咪驚他破相呀！

舊年７月２４日，柏晞就夾親手指

http://hk.myblog.yahoo.com/wym1115carman/article?mid=36

今年輪到柏緯砍穿頭，真係大吉利是！

細妹話都唔知係唔係間屋風水有問題，自從搬進到這裡，經常與老公有爭執，兩個仔又整親，唉．．．都唔知點算好呀，快ｄ中六合彩啦！

初七人日@行街街

２００９年２月１日星期日

今日舅母約咗我地去飲茶，老豆媽子先去攞位，我與細佬一家隨後來到，好在不是我們最遲，還有舅母的三個寶貝女，舅母真係好墀利，真係寡母婆帶女，舅父同舅母結咗婚4年，生咗３個女，細女都未夠一歲，舅父因為胃癌就去咗喇！不經不覺大女都快１８歲了，可能舅母係大陸人，佢好就得ｄ女，要乜就比乜咁滯，我都試過因一些事睇唔過眼，鬧喊佢３個女，搞到我自己都喊埋一份！

飲完茶同細佬一家去咗行街街，經過上水廣場搞緊《風生水起賀新春》

但係唔明點解係介紹摺扇囉？仲以為會見到蘇民峰!

30工匠半年精製 全球最大百萬摺扇

扇藝展中最吸引人的，莫過於全球最大的「金獎扇王」。估值逾百萬元的「金獎扇王」產自中國山東省，扇骨高3.5米，展開後直徑達7 米，由 30 位工匠耗時半年完成。追把巨型摺扇曾在1998年舉行的首屆中國扇子藝術大展獲金獎殊榮，故名為「金獎扇王」。

僅如一毫子銀仔 全球最袖珍摺扇上百馬奔騰　

欣賞「金獎扇王」要把身體隨著移動，而欣賞微雕摺扇「百馬」就要眼定定！「百馬」是中國第一把象牙微雕摺扇，蘇州著名工藝美術雕刻大師虞心昌在直徑僅 2 厘米的摺扇上，借鑒元代名家趙孟頫的山水書畫風格，雕刻出百駿圖。在1984年製作的「百馬」亦曾獲全國第一屆「五小智慧杯」大獎賽一等獎。

阿妹搵到馬圖案象牙扇，佢話係佢生肖嚟喎！

呢把金扇仲勁啦！

睇完大小摺扇，就過隔離商場行吓啦，去到上水中心，原來有幸福摩天輪，

緊係要去轉個運啦！

初五@病倒了

２００９年１月３０日星期五

噚日下午已經Wing Wing地，最衰都係死肥Ken啦，

問佢出邊凍唔凍，佢話有太陽，暖暖地喎，

我咪無著外套落咗銅鑼灣囉！

就係咁樣中招喇！

係屋瞓咗成日，晚上細佬打電話問我聽日幾點出發去迪士尼，

我話佢知，我今日病咗無返工，睇怕聽日都係去唔成，

佢兩個仔女（浩倫&芍曈）當然唔開心啦！

本來約好咗老豆、媽子、細佬一家&大細妹一家去迪士尼，

探新年米奇&米妮，因為肥Ken，就搞到掃晒興喇！

初四@開工不大吉

２００９年１月２９日星期四

本來放兩日假就可以享受Long Week-end，

好可惜"社情"上星期才印好，老細話最好新年前搞掂喎！

你估我係Superwoman咩！

所以放唔到假囉！鬼叫你６仔唔生勝咩！

繼續努力啦！

好彩上星期有芳芳&Anna幫手，今日四點零鐘就搞掂晒喇！

Lunch Time落咗銅鑼灣Toysrus買生日禮物比柏晞，

就係咁樣衰咗囉．．．．．．

赤口@去拜年

２００９年１月２８日星期三

今日同細妹去兩處拜年，朝早去粉嶺林國媚家，下午就去藍田周英銀家！

佢地其實都係我細妹ｄ朋友嚟，不過同我一樣咁fan，所以就去度拜年囉，

我要比利是佢地兩個女嘛（咁啱兩個都係有兩個女喎）！

去到阿媚度，已見到阿嫻到咗，（阿嫻係阿媚叔仔個老婆，又係阿媚個fan, 佢地fan到要搵兩兄弟做老公，阿嫻都有一個仔！)

佢地兩個老公都好怕醜，一個去咗行山，一個去咗行街，我地都唔係好得人驚啫，最多都係窒吓同笑吓佢兩個啫！

寒暄到十二點左右，我地係時候去藍田喇！

（唔記得咗同阿媚兩個女&阿嫻個仔影相呀，佢地仲話特登著靚靚見我地嘛！）

到樓下搭２７７X去平田，唔使一個鐘就到達喇，去吉之島買份禮先得！

呢度ｄ購物車又幾得意喎，孖寶兄弟第一時間就霸咗兩架喇！

我都有成年無見過阿May兩個女喇，佢地好鬼忙嫁，最鍾意係跳舞，佢阿媽又要帶去練舞，又要去表演，又要去比賽，所以好難就到時間見佢地！

記得佢地細細個果陣，好鍾意同埋浩倫四圍去，沙士果一年就去得最多地方，因為佢地都要停課嘛！

不經不覺蔣澤盈已經十歲喇蔣繞樺都八歲，看起來真的有一點兒少女feel呀！

以下係佢地２００３年果陣ｄ相，睇吓有冇轉變？