適逢今日係我生日既大日子,她她她她話要去 Ocean Park 為我慶祝喎!
貪佢正日生日果位入場唔駛錢,咁啱由11月3日至12月12日推出7折優惠活動,
只要持有香港居民身份證或出生證明書,到門口票務處即可已7折購票,咁抵玩更加去啦!
約咗文迪,SaSa &丹丹九點半係金鐘大快活食早餐,NatNat因為就唔到船期,
所以就唔同我地食,等佢嚟埋就搭629城巴到 Ocean Park!
文迪:喂,卡旻e我到咗喇,唔見你喎?
卡旻e:我坐咗係度好耐啦!
文迪:真係見唔到你喎,坐係邊呀?
卡旻e:坐係收銀後面最出玻璃窗口位呀!
文迪:邊度呀?
卡旻e:你係唔係去咗大家樂呀?我地約係大快活喎!
文迪:!係喎,我係大家樂呀!
卡旻e:正傻婆,快d過隔離啦!
文迪:或者SASA仲衰過我啦!
卡旻e:SASA而家都唔知幾醒呀!
柴魚花生粥加蘿蔔糕做早餐,三件咁多,比件文迪食先得!
生日優惠Free Adult,咁啱公益金今日賣旗,原來同我咁大喎!
大樹灣入口,所以第一時間就睇到好多紅鸛呀!
指定動作,到此一遊!
由於集古村重建中,所以無乜野好睇,我地就向山上出發喇!
全亞洲最長嘅自動行人電梯就係呢度喇!
第一站就係滑浪飛船,原本無諗住玩機動遊戲,見最安全就係佢,一於去玩喇,
點知得我地一老一嫩敢去玩,果三隻野死都唔肯,
咁我地去排隊喇,排排吓,見到玩完d人濕晒身,最後我倆都係縮沙!
大興土木中,未來就會有酒店喇!
先到"太平洋海岸"見吓海豹、海獅,超可愛呀!
跟住排隊上"海洋摩天塔"欣賞四周風景先,曬到我地死死吓!
睇吓人地自由行幾醒,自製太陽帽呀!
排咗半粒鐘,轉得果半分鐘,真係瞬間看地球!
熱咗咁耐,佢兩個第一時間就去買杯沙冰消暑番!
抖完就去睇八月先到港嘅"中華鱘",之前放係"海洋館"比海狼咬死咗一條,
所以就要鯊魚館讓路,比咗個藪佢地喇,鬼叫人地係國寶咩!
我都係鍾意睇鯊魚多d!
順路睇埋海洋館,就可以去飯Lunch喇!
園內食野一定貴,好彩今日有八折,咁就差不多!
日式拉麵$52、雞扒飯$70、龍鯏飯$80、飲品$28
食飽就去睇水母,燈光加音樂陪襯,一流!
睇完水母諗住坐纜車落下睇熊貓啦,點知SASA好想去"海洋劇場",
要睇吓海豚&海狗表演,因為就嚟開場,所以坐位都比人霸佔晒,
我地為有曬住嚟睇啦,又估唔到SASA睇得咁投入喎!
跟住就去排隊坐纜車,條龍都幾長呀,仲要有人想打尖,
文迪即刻火都嚟,幾鬼惡鬧果兩條自由行呀,我地都比佢嚇親,
平時唔聲唔聲,出聲你地就知死,文迪勁呀!
其實我好驚坐纜車,尤其是果d"gaga"聲,點知SASA原來仲驚過我地,
真係睇唔出喎,上次同佢去"3碌Ling"都唔覺佢驚喎!
去熊貓館前經過"七彩昇空天地",剛剛有班人(應該係大陸雜技團)表演,
班細路哥又幾勁喎!
終於可以睇到熊貓喇,安安、佳佳各有一個場,
盈盈、樂樂就住埋一齊,我上次(2006年)嚟都睇唔到安安、佳佳呀!
果陣佢地好似住埋一齊,唔通離咗婚,要分居?
紀念品都幾靚呀,不過一件都無買到!
今次有四張大合照呀!
係時候去食飯,因為SASA想食煲仔飯,NatNat就帶咗我地去西環坤記,
生炒骨好味、椒鹽中蝦都唔錯、油浸荀殼魚滑滑滑、
生菜鯪魚球煲無澳門咁好食、鴛鴦腸煲仔飯好正、滑雞煲仔飯好滑,
飯蕉一流,真係好介紹!
行程完畢,個個行到腳仔軟,返屋企要搵人按摩吓先得!